Link açıqlığı

Google Qırım meskün yerlerini dekommunizatsiyadan keçirdi


Google haritasınıñ skrinşotı, Krasnoperekopsk adı Yañı Qapuğa deñiştirildi

Google maps qıdıruv servisi işğal etilgen Qırımnıñ meskün yerlerini Ukraina Yuqarı Radasınıñ yarımadanıñ ayrı rayonlar, şeerler ve köylerniñ adlarını deñiştirüv aqqında fermanğa binaen qayd etti.

Böyle etip, Krasnoperekopsk şeerini Google maps endi Yañı Qapu, Lenino köyüni – Yedi Quyu, Kefe civarındaki Orconikidze kurort köyüni – Kaygador, Krasnogvardeyskoyeni – Qurman, Kirovskoyeni – İslâm-Terek dep adlandıra.

Umumen olaraq, 75 meskün yeri ve 5 rayonnıñ adı deñiştirildi.

Google haritasınıñ skrinşotı, Orconikidze adı Kaygadorğa deñiştirildi
Google haritasınıñ skrinşotı, Orconikidze adı Kaygadorğa deñiştirildi

Mayıs 12-de Yuqarı Rada, dekommunizatsiya aqqında qanun çerçivesinde, Qırımda 75 meskün yeri ve beş rayonnıñ adını deñiştirdi. Yañı adlarnıñ çoqusı qırımtatardır.

Bunen beraber, Google mapsta deñiştirilgen adlarnı internet qullanıcıları tek Ukrainada degil de, amma Rusiyede ve Qırımda da köre.

Yuqarı Radada fermannı muzakere etkende, halq deputatı ve Qırımtatar Milliy Meclisiniñ reisi Refat Çubarov parlament tribunasından yañı adlar fermannıñ imzalanğanından başlap qullanmasını teklif etken edi.

İçtimaiy ağlar qullanıcıları Rusiyede «topraq bütünligini bozğan» resursnı blok ete bileler, dep qorqqanını bildirdi. Diger qullanıcılar qayd etti ki, böyle yañılıq munasebetinen Google destek hızmetine muracaat yolladı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG