Amerika Qoşma Ştatları prezidentine Cumhuriyet firqasından namzet Donald Tramp ilân etti ki, devlet prezidenti vazifesine saylanılsa, Qırımnıñ rusiyeli olğanını resmiy olaraq tanımasını baqmağa azır. Bunı siyasetçi iyül 27-de, çarşenbe künü ilân etti, dep bildire «Amerika sesi», amerikalı Politico neşrine esaslanıp.
Bunen beraber, Tramp qayd etti ki, Rusiyege qarşı sanktsiyalarnıñ lâğu etilmesi meselesini baqmağa azır.
«Elbet, bunı baqacaqmız», – dep ayttı siyasetçi, Qırım ve Rusiye aqqında sualine cevap berip.
Cumhuriyetçiniñ sözleri, ekspertler tarafından çoq izaatlarnıñ peyda olmasına yol berdi.
«Bu amerikalı ve avropalı qıymetler ve menfaatlarnıñ deñişmesidir», – dep bildirdi Twitterde Harvard Kennedy School professorı Nikolas Berns.
«Tüşünmedim ki, Tramp daa ziyade Putin tarafını tutqan ola bile, amma endi o ayta ki, sanktsiyalarnı lâğu ete bile ve Qırım işğalini tanıy bile. Şaşılacaq bir şey», – dep qayd etti CFR analitika merkeziniñ tedqiqatçısı Maks But.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
