Dnepr şeer şurası deputatları iyül 27-de keçirilgen nevbetteki sessiya çerçivesinde şeerde vaqtınca işğal etilgen Qırımğa taşıma ve yarımada territoriyasında raatlıqnıñ reklamasınıñ yerleştirilmesini yasaq etti.
Bu aqta Dnepr şeer şurasınıñ matbuat hızmeti bildire.
«Keliñiz, bu meseleni siyasiy saasından ameliy saağa keçireyik. Reklama yasaqtır. Er kes olıp keçkeniniñ (Ukraina şarqında ve Qırımda – QA) ne qadar deşetli olğanını añlay, bu qararğa qol tutmalı», – dedi şeer yolbaşçısı Boris Filatov, deputatlarğa muracaat etip.
Daa iyün ayında Dnepr şeer yolbaşçısı Boris Filatov nevbetteki şeer şurası toplaşuvında Qırımda raatlıq reklamasını yasaq etmek niyeti aqqında bildirdi.
Böyle etip, o, şeerde yaqında teşkil etilgen «Turistik separatizm – STOP» areketine destek kösterdi, onıñ iştirakçileri Qırımda raatlıq reklamasını qopara.
Rusiye tarafından işğal etilgen Qırım ve Ukrainanıñ qıtaiy qısmı arasında naqliye alâqası qapalı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
