Kremlge boysunğan işğal etilgen Qırım ükümeti çarşenbe künü keçirilgen toplaşuvda Qırım astrofizik observatoriyasınıñ (QrAO, Bağçasaraydaki Nauçnıy köyü) taşınmaz malları, naqliye aletleri ve pek qıymetli taşınğan mallarını federal mülkiyetke teslim etti. Bundan evel QrAO işğal etilgen yarımadanıñ devlet mülkiyeti edi.
«Qırım cumhuriyeti Mülk ve topraq munasebetler nazirligine «Qırım astrofizik observatoriyası» federal devlet bücet ilim müessisesine operativ idare aqqınen fermannıñ ilâvesinde qayd etilgen mülkiyetniñ qoşmasını teminlemek», - dep aytıla müessiseniñ qararında.
Bunen beraber, toplaşuvda Qırım ükümeti Qırım mülkiyetinden federal mülkiyetine Qara deñiz gidrofizik poligonını (Katsiveli köyü) qarşılıqsız teslim etti.
Qırım Muhtar Cumhuriyeti prokuraturası iyül 27-de vaqtınca işğal etilgen Qırım territoriyasında bulunğan devlet malınıñ qanunsız elde etilmesi aqqında altı cinaiy iş boyunca mahkemeden aldın taqiqat aqqında bildirgen edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
