İşğal etilgen Qırımğa ecnebiy eyetlerniñ ziyaretleri – Rusiye tarafını tutqan marginal siyasetçiler içün «siyasiy qazanç usulıdır». Böyle fikirni Qırım.Aqiqat Radiosınıñ saba yayınında «İnternews-Ukraina» cemaat teşkilâtınıñ avropalı leyhalarınıñ idarecisi Vladimir Guşuley, yarımadanı ziyaret etken ecnebiy eyyetlerniñ itibarına izaat berip, bildirdi.
«Adetince bu, marginal siyasetçiler ola, bu, siyasiy qazançtır. Qırımğa ketken siyasetçilerge baqsaq, bu – bundan evel Rusiye tarafını tutqan muzakerelerde «körüngen» siyasetçilerdir, olar rusiyeli tışqı siyasetniñ aleti ola, bunıñ içün olarnıñ areketleri mustaqil degil», – dedi o.
Rusiye tarafından işğal etilgen Qırımda iyül 29-da Tyerri Marianiniñ yolbaşçılığında Frenkistan Cumhuriyeti Milliy Toplaşuvı deputatları ve Senat azalarınıñ ziyaretini bekleyler. İşğal etilgen yarımadada frenkler üç kün bulunacaq, dep bildire Kremlge boysunğan Qırım parlamentiniñ matbuat hızmeti. Eyyet azalarından biri ziyaretten endi vazgeçti.
Ukraina Tışqı işler nazirligi iyül 25-te muracaatnı derc etti, vesiqada müessise ecnebiy vatandaşlarnı ve vatandaşlığı olmağan şahıslarnı Qırımğa qanunsız ziyaretlerden tenbiyeley. Bundan evel Frenkistan Tışqı işler nazirligi parlamentariylerniñ ola bilecek Qırımğa ziyaretini takbih etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
