Link açıqlığı

Rusiyege boysunğan Kezlev akimiyeti «Motodesant» bayk-rok festivalini teşkil etmege planlaştıra. Şeer memuriyeti matbuat hızmetiniñ bildirgenine köre, festival halqara olacaqtır, merasimde iştirak etmek içün Odessa, Nikolayev, Yañı Zelandiyadan musafirler davet etildi.

«Festival hedlaynerleri – «Kapitanlar seyyaresi» (Odessa ş.). Mahsus musafirler – «Canlılar» art-leyhası (Nikolayev ş.). Bundan da ğayrı, merasimde Günter Strasse (Yañı Zelandiya), KooRagA (Aqyar ş.), Aella (Moskva ş.), Kolizey (Moskva ş.), Kloun kölgesi (Aqmescit ş.), Region 82 (Aqmescit ş.), Dogma (Aqmescit ş.) iştirak etecek», – dep qayd etile beyanatta.

Merasim iyül 29-dan 31-ge qadar Yalı Moynaq (Zaozörnoye) köyünde «Çayka» pansionatınıñ territoriyasında keçirilecek. Teşkilâtçılarnıñ aytqanlarına köre, festival 2012 senesinden başlap keçirile, bu sene bir yarım biñden ziyade insannıñ iştirak etmesi beklenile.

Odessalı «Kapitanlar seyyaresi» gruppasınıñ Facebook saifesinde onıñ iyül 30-da Kezlevdeki festivalinde iştirak etecegi aqqında bildirile.

Ukrain ükümetiniñ odessalılarnıñ işğal etilgen Qırımda merasimde iştirak etmeleri boyunca resmiy izaatı yoq.

bundan evel Ukraina Tasil nazirligi bildirdi ki, ukrain aliy oquv yurtunıñ ocasını işğal etilgen Qırım yarımadası territoriyasında konferentsiyada iştirak etkeni içün işten boşattı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG