Rusiye tarafından işğal etilgen Qırımda yol qazalarınıñ sayısı, 2016 senesiniñ ilk yarım yılı köstergiçlerine binaen, keçken senege köre, 44,6%-ğa arttı. Bu qazalarda zararlanğan vatandaşlarnıñ sayısı 40,3 fayızğa arttı. Bu aqta Rusiye İçki işler nazirligi paylaşqan «2016 senesi I-ci yarım yılında Rusiye Federatsiyasında yol qazaları» haber-analitik közetüvinde söz yürsetile.
Statistikağa köre, 2016 senesi başından Qırımda 940 qaza yüz berdi, olarnıñ neticesinde 146 kişi elâk oldı ve 1188 insan yaralandı.
Statistika malümatlarına binaen, eñ çoq qaza Aqmescitte yüz berdi – 302. Misal olaraq, Yaltada 67 qaza oldı.
Bunen beraber, közetüvde qayd etilgenine köre, Qırım yollarında qazalarda elâk olğanlarnıñ sayısı 15%-ğa arttı.
Bundan evel Aqyar Vatandaşlarnı saqlav tedbirlerniñ teminlenmesi idaresi yolbaşçısınıñ muavini Aleksandr Sadofyev bildirdi ki, şeerde, keçken seneniñ aynı müddetine köre, yol qazalarınıñ sayısı 20%-ğa arttı.
Mayıs ayında Aqmescit akimiyeti qazalarnıñ sayısı artqanı aqqında bildirgen edi, bunı yollarnıñ keyfiyeti kerginleşkeninen añlattılar.
İçki işler nazirligi yanındaki «Problemasız yollar» rusiyeli cemaat leyhasınıñ malümatına binaen, keçken sene Qırım eñ yaramay yollar olğan regionlarnıñ ilk üçüne kirdi. Rusiyeli faallerniñ tedqiqatlarına köre, Qırım, yaramay yollarğa şikâyetlerniñ sayısı boyunca, Moskvadan soñ, ekinci yerde buluna.
