Link açıqlığı

Kiyevde faaller Rusiye elçiligi yanında Qırımda Ervin İbragimovnıñ hırsızlanması aqqında hatırlatacaq


Ervin İbragimov

Kiyevde bu sene mayıs ayında Bağçasarayda ğayıp olğan Ervin İbragimovğa destek köstermek içün aktsiya keçirilecek. Teşkilâtçılarnıñ bildirgenlerine köre, merasim iyül 27-de Rusiye Federatsiyasınıñ Ukrainadaki elçiligi yanında keçirilecek.

«Cemaatçılıqnı işğal etilgen Qırım territoriyasında insanlarnıñ zorbalıqnen ğayıp olması aqqında unuttırmamağa, Rusiye Federatsiyası ükümetini ise, Ervin İbragimov ve diger hırsızlanğan insanlarnı tapmaq içün acele tedbirler keçirmege çağıramız», – dep qayd etile merasimniñ Facebook saifesinde.

Aktsiya teşkilâtçıları arasında Qırım SOS cemaat teşebbüsi, Qırımtatar Milliy Meclisi, Rusiyede sabıq siyasiy mabusı olğan Qırım sakini Gennadiy Afanasyev bar.

Ervin İbragimovnıñ hırsızlanması aqqında 2016 senesi mayıs 24-te haber peyda oldı. Rusiye Taqiqat komitetiniñ Qırım idaresi ğayıp olğan Qırım sakinini qıdırmağa başlağanını bildirgen edi.

Bağçasarayda hırsızlanğan Ervin İbragimovnıñ soy-sopları onıñ qaytarılması içün 1 million ruble bereceklerini ilân etti.

Rusiyege boysunğan işğal etilgen Qırımnıñ prokurorı Natalya Poklonskaya hırsızlanmanıñ üç ola bilecek sebebini ayttı: para almaq maqsadınen hırsızlav, İbragimovnıñ ticariy faaliyeti ve «Qırım uquq qoruyıcı organlarına iftira atmağa istep, Qırımdaki vaziyetni kerginleştirmek maqsadınen yapılğan hırsızlav».

Qırım işğal etilgen soñ yarımada territoriyasında adamlar, hususan qırımtatarlar ğayıp olmağa başladı. Bunen beraber, Rusiyege boysunğan Qırım taqiqat komitetinde «yarımadada qırımtatarlar kütleviy şekilde ğayıp olmağanını» bildireler.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG