Link açıqlığı

Saatnıñ esas haberi

Aqmescit azbarlarındaki yollarnıñ tamir etilmesine 67 mln ruble kerek olacağı belgilendi


Aqmescitniñ ameldeki akimiyeti maalleler içindeki evlerara keçitlerniñ tamir etilecegini bildire, bunıñ içün 67 million ruble ayırılacaqtır. Bu aqta Kremlge boysunğan Aqmescit memuriyetiniñ yolbaşçısı Gennadiy Baharev ilân etti, dep bildire müessiseniñ matbuat hızmeti.

«Bu para yeterlidir. Şeer şurası deputatlarınen beraberlikte, sakinleri tertip boyunca işbirlik taraftan eñ faal olğan azbarlarnı belgileymiz. Eñ yaqın vaqıtta şeer şurası sessiyasında para ayırılması boyunca mütenasip qarar qabul etilecek. Aqmescit sakinlerini bu mesele boyunca deputat korpusınıñ temsilcileri ile faal şekilde işbirlik tutmağa çağıram, deputatlar paranıñ işke tüşürilmesi boyunca idareciler ola», – dep qayd etti Baharev.

İyül 25-te Rusiye baş naziri Dmitriy Medvedev işğal etilgen Aqyarda yarımada yolları vaziyetinen bağlı toplaşuv keçirdi.

«Qırım baarinden» soñ rusiyeli ükümet Qırım sakinlerine bergen çoq vadeler arasında esas yöneliş yarımadanıñ yol ağınıñ bütünley yañılması edi. Bu planlar soñ 2020 senesine qadar Qırım ve Aqyarnıñ içtimaiy-iqtisadiy inkişafı Federal programmasına kirsetildi. Olarnıñ ömürge keçirilmesine 100 milliard rusiyeli rubleniñ ayırılması belgilendi.

Eki yıl keçken soñ yarımadanıñ strategik avtomobil yollarınıñ çoq qısımları öyle de tamir etilmeyip qala, esas leyhalarnıñ ömürge keçirilmesi müddetleri başqa tarihlarğa keçirile.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG