Link açıqlığı

İyül 26-da, salı künü Rostov-na-Donu şeerindeki Şimaliy-Qavqaz okrug arbiy mahkemesi Maksim Filatovğa qarşı açılğan cinaiy işni baqıp başlaycaq, onı «Azov» ukrain batalyonınıñ askeri dep adlandıralar. Bu aqta mahkemeniñ matbuat hızmeti bildire.

«Filatov Maksim Aleksandroviçke qarşı cinaiy iş boyunca toplaşuv iyül 26-da, saat 11-de başlanacaq», – dep aytıla beyanatta.

Taqiqatnıñ fikrince, Filatov, milletlerara munasebetlerni kerginleştirmek maqsadınen, 2014 senesi aprel ayında Aqmescitteki «Çuqurça» camisiniñ binasını yaqtı, aynı bu sene avgust ayında ise, «cumhuriyet prokuraturası binası yanında terroristik eylemni etmege tırıştı».

Qırımnıñ rusiyeli prokurorı Natalya Poklonskaya Filatovğa qarşı qabaatlavnı Rostov mahkemesine 2016 senesi iyün başında yolladı.

«Azov» Vatandaş korpusında işğal etilgen Qırımda yaqalanğan ve Rostov-na-Donu mahküm etilecek Maksim Filatov olarnıñ batalyonınıñ askeri olğanını tasdıqlamadılar.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG