Link açıqlığı

Qırımda Sürgünlik künü matem mitinginiñ keçirilmesi yasaq etilmesine qarşı şikâyet arizasınıñ baqılması sentâbr ayına keçirildi – Smedlâyev


Zair Smedlâyev

İşğal etilgen Qırımnıñ Rusiyege boysunğan apellâtsion mahkemesi Krasnoperekopsk rayonında qırımtatar halqınıñ sürgünligi künü matem mitingi keçirilmesiniñ yasaq etilmesine qarşı şikâyet arizasınıñ baqılmasını sentâbr ayına keçirdi. Bu aqta Qırımtatar Qurultayı Merkeziy saylav Komissiyasınıñ reisi Zair Smedlâyev bildirdi.

«Mayıs 18-de Voinka köyünde matem mitingi keçirilmesiniñ yasaq etilmesine qarşı Saniye Ametovanıñ şikâyet arizasınıñ baqılması, mahkemeci Terentyevanıñ hastalığı sebebinden, sentâbr 5-ke, saat 9:30-ğa keçirildi», – dep yazdı o Facebook saifesinde.

Mayıs 18-de Krasnoperekopskta mahkeme qararı sebebinden qırımtatarlar matem mitinginiñ keçirilmesini lâğu etmek mecbur oldı: o vaqıt tek çiçekler qoyuldı. Mahkeme mayıs 17-de qarar çıqardı, mayısnıñ 20-ci künleri şikâyet arizası berildi.

Zair Smedlâyev Qırım.Aqiqatqa bergen izaatında şikâyet arizasınıñ böyle keç baqılmasını añlaşılmağan dep adlandırdı, onıñ keçirilmesi iyül 26-ğa belgilengen edi.

Bundan evel bildirilgenine köre, Qırımda regional meclisler, bu cümleden, Krasnoperekopskta ve Sudaqta, Rusiyege boysunğan ükümetten mayıs 18 qırımtatar halqınıñ sürgünligine bağışlanğan matem merasimlerniñ keçirilmesini uyğunlaştırması boyunca red etüvlerni alğan edi.

Mayıs 18 – Qırımdan qırımtatar halqı sürgünliginiñ qurbanlarını añma künüdir. Bu kün 1944 senesi yarımadadan Orta Asiyağa qırımtatarlarnen ilk eşelon yollanıldı. Umumen olaraq, 180 biñden ziyade insan sürgün etildi.

Er sene Qırımda matem kününe bağışlanğan kütleviy merasimler, bu cümleden Qırım paytahtınıñ merkezinde Meclis tarafından teşkil etilgen matem mitingi keçirile edi. Amma Qırım Rusiye tarafından işğal etilgen soñ Aqmescit merkezinde bu kibi merasimlerniñ keçirilmesi yasaq oldı.

XS
SM
MD
LG