Link açıqlığı

Saatnıñ esas haberi

Qırım ükümeti 2017 senesi yanvar ayına qadar qırımtatar mektebini qurıp bitirmege vade ete


Aqmescitteki qırımtatarlar toplu yaşağan Bor Çoqraq (Fontanı) qasabasında yañı mektep qurula. İşğal etilgen Qırımnıñ ameldeki ükümeti ayta ki, obyekt bu seneniñ soñuna qadar qurulıp bitirilecek.

«Qurucılıq işleri evel belgilengen grafik boyunca yapıla. Obyekt mürekkeptir, vaqıt çoq degil: dekabr ayında leyha bütünley bitirilmek kerek», – dep qayd etti Kremlge boysunğan Qırım parlamentiniñ yolbaşçısı Vladimir Konstantinov qurucılıqnı ziyaret etkende. Bu aqta müessiseniñ matbuat hızmeti bildire.

Elde etilgen malümatqa köre, Konstantinov Qırımda qırımtatar tilinde tasil berilgen mekteplerniñ teşkil etilmesi kerek olğanını tasdıqladı.

«Onıñ sözlerine binaen, qasaba sakinleri mektepniñ işke tüşürilmesinen pek meraqlana, oquv yurtuna ihtiyac büyüktir», – dep aytıla beyanatta.

Matbuat hızmetinde bildireler ki, yañı mektepte 900 talebe oquycaq, bina «Rusiye Federatsiyasınıñ bütün talaplarına uyğan» eñ zemaneviy aletlernen, bu cümleden yanğın havfsızlığı ve video nezaretinen, temin etilecek.

Qırım ve Sevastopol musulmanları diniy idaresinde de qırımtatar tiliniñ inkişafı ve saqlanması meselesini qayd etken ediler.

Qırım Rusiye tarafından işğal etilgen soñ, yarımadanıñ milliy mekteplerinde bile balalar rus tilinde tasil ala, qırımtatar mekteplerinde ne oquv kitapları, ne de derslikleri bar. Bunı er vaqıt Mecliste ve qırımtatar cemaat teşkilâtlarında qayd eteler.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG