«Hizb ut-Tahrir» işi bounca üç yaqalanğan kişi – Yalta sakinleri Emir-Usein Kuku, Vadim siruk ve Refat Alimov – «taqiqat altında bulunğan telükeli insanlar» olaraq profilaktika qayd etilüvine qoyuldı ve Rusiye tarafından işğal etilgen Aqmescit SİZO-sınıñ mahsus bölügine keçirildi. Bu aqta İnsan aqları boyunca kontakt gruppasınıñ azası Emir-Usein Kukunıñ adliyecisi Aleksandr Popkov Qırım.Aqiqatqa izaat berip, bildirdi.
«Esasen, bunı (profilaktika qayd etilüvine qoyulması – QA) belgilegen şey budır: onı mahsus bölükke keçirdiler. Ve o şimdi anda ayrı nezaret astında buluna. O yerde daa çoq teşkerüvler keçirile, daa çoq baqalar, biraz başqa kameralar», – dep qayd etti adliyeci.
Onıñ malümatına köre, onıñ tarafından imaye etilgen insan mahsus bölükte endi tahminen bir afta devamında buluna. Emir-Usein Kuku keçirilgen kamerada daa az adam bar, amma o yerde televizor yoq.
Aleksandr Popkovnıñ bildirgenine binaen, bu kibi mahsus bölüklerge rusiyeli SİZO-larda esasen ya uquq qoruyıcı organlarınıñ sabıq hadimlerini, ya da pek telükeli cinayetçilerni keçireler.
«Bilmeyim, ne sebepten ve nasıl bu qarar qabul etildi. Bunıñ içün buña qarşı pek faaliyet köstermeycekmiz. Tek kerçek olaraq: meraqlısı şu ki, tek muzakerelerniñ bir qısmı – kimsenen bir şey muzakere etkeni içün qabaatlanğan, bundan soñ terroristik teşkilâtnı teşkil etkeninde qabaatlanğan kişi – endi taqiqat altında bulunğan pek telükeli insanlar arasına kirsetildi», – dep qayd etti Popkov.
Bundan evel bildirilgen malümatqa binaen, «Hizb ut-Tahrir» işi bounca yaqalanğan eki kişi – Emir-Usein Kuku ve Vadim Siruk – rusiyeli FSB taqiqatçısınıñ areketlerine qarşı şikâyet arizalarını berdi. Rusiyege boysunğan Aqmesctitteki Kiyev rayon mahkemesi bu şikâyet arizalarını iyül 28-de baqıp çıqmaq kerek.
Aprel 17-de Yaltadaki Qızıltaş köyünde rusiyeli uquq qoruyıcılar tintüvler keçirdi, neticede eki qırımtatarnı – Refat Alimov ve Arsen Cepparovnı yaqaladılar. Bundan soñ Rusiyege boysunğan Qırım prokurorı Natalya Poklonskaya Yaltada «Hizb ut-Tahrir» ile bağda olğanında şeklengen eki insan yaqalanğanını bildirdi.
Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı: Yaltada İnsan aqları bağ gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve Yaltalı Vadim Siruk. FSB taqiqatçıları olarnı Rusiyede yasaq etilgen «Hizb ut-Tahrir» teşkilâtında iştirak etmeleri ile qabaatladılar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
