Rusiye Federatsiyasınıñ «terrorizmge qarşı» qanunlar paketine er angi insannı, onıñ içtimaiy statusı ve maddiy vaziyetine baqmadan, «keliştirmek» mümkün. Rusiye tarafından işğal etilgen Qırımnıñ sakinleri çaqma rağbetlendirilgen vaziyette «muqayt olmaq» kerek, ve olarnı bu tiymez, dep tüşünmemek kerek. Böyle fikirni Qırım.Aqiqat Radiosınıñ saba yayınında ruhiyatçı Larisa Voloşina, «Yarovaya paketi» dep adlandırılğan qanunlarnıñ işke tüşürilmesine izaat berip, bildirdi.
«Neler olıp keçkenini añlamaq kerek. Yani, esası – yaşayışqa batmamaq, sen kiçik insansıñ ve seni tiymezler, dep tüşünmemektir. Tiyecek, çünki – «kiçik adamlar» da ertemi, keçmi repressiyalarğa oğraycaq, aynı tamamınen sadıq insanlarnıñ – «daiy» safdaşlarınıñ taqımı da repressiyalarğa oğraycaq. Bu amelde olğan şey. Añlamaq kerek ki, tek telükeni kerçekten de añlağan soyları ayatta qala», – dep qayd etti ruhiyatçı.
Rusiye prezidenti Vladimir Putin «terrorizmge qarşı paketini» iyül 7-de imzaladı. Deñişmeler paketi «çaqmama» ve kütleviy nizamsızlıqta iştirak etmesine «yaqınlaşma» içün cinaiy mesüliyetniñ kirsetilmesini belgiley. Bağ operatorları endi müşterilerniñ bütün telefon laflarını ve mesajlarını yazmaq ve saqlamaq mecbur.
Soñki yıllar devamında Rusiyede «ekstremizm» içün yaqalanğanlarnıñ sayısı pek arttı. Moskvalı «Sova» haber-analitik merkeziniñ malümatına binaen, keçken sene devamında, eñ azdan, beş yüz kişi mahküm etildi. Olardan onlarca insanlar apiske qapatıldı. Bunıñ sebebi içtimaiy ağlarda online beyanatlarnıñ yerleştirilmesi ve paylaşılması oldı.
