İşğal etilgen Aqyar şeer parlamentiniñ deputatları şeer şerefli vatandaşı nişanınıñ körünişini tasdıqladı. Yañı nişannı Rusiye prezidenti Vladimir Putinge taqdim etecek olalar. Bu aqta Kremlge boysunğan şeer parlamentiniñ matbuat hızmeti bildire.
«Soñki toplaşuvlarnıñ birinde parlamentariyler Vladimir Vladimiroviç Putinge «Aqyar şeeriniñ şerefli vatandaşı» unvanını bermek qararını qabul etti. Rusiye Federatsiyası prezidenti Qırımnıñ Rusiye ile birleşkeninden soñ qaraman şeeriniñ ilk şerefli vatandaşı olacaq», – dep aytıla beyanatta.
Beyanatta qayd etile ki, Aqyar şeeriniñ şerefli vatandaşı nişanı sekiz nurlı kümüş yıldızdan ibaret, onıñ merkezinde eki admiral lengerinde tögerek defne çemberi kösterilgen, çemberniñ tışqı konturında ise, üstünde «Aqyar şeeriniñ şerefli vatandaşı» yazısı ile şerit bar.
Çember merkezine cilâlı yarı qıymetli yaşma taşı qoyulüan, onıñ üstünde Aqyar şeeriniñ ilk abidesi olğan, Aleksandr Kazarskiyğe bağışlanğan abideniñ kümüş resmi bar. Çember temelinde «Nesilge nümüne olaraq» sözlerinen altın kartuş yerleşken. Naşannıñ kalibri 55 millimetrniteşkil ete.
Mayıs soñunda Aqyar parlamentiniñ deputatları nevbetteki sessiyada Rusiye prezidenti Vladimir Putinge «Aqyar şerefli vatandaşı» unvanını berdi.
Resmiy beyanatqa köre, Rusiye prezidentine fahriy unvan «Aqyar şeeri ve Rusiye Federatsiyası içün yapqan yararlıqları içün» berildi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
