Keriçte iş adamlarınıñ qanunsız teşkerilmesi çoq keçirilip başladı. Bu aqta Moskvağa boysunğan şeer memuriyetiniñ matbuat hızmeti bildire.
«Soñki vaqıtları Keriç şeerinde özüni belediye organlarınıñ hadimleri olaraq tanıtqan belli olmağan şahıslar tarafından hocalıq subyektleriniñ qanunsız teşkerilmesiniñ keçirilmesi belgilendi. İşbu adamlar sahte şahıs şeadetnamelerini qullana bile», – dep tenbiyeleyler müessisede.
Bu sebepten Keriç memuriyeti saytında istimal malları ve hızmetleri saasında belediye nezareti ve monitoring yapmasında vekâletli hadimlerniñ fotoresimleri ve olar aqqında malümat yerleştirilgen.
Şeerniñ ameldeki akimiyet muracaat ete ki, özüni Keriç memuriyeti hadimleri olaraq tanıtqan ve teşkerüv keçirmek aqqını boynuna alğan diger kişilerniñ kelgende, iş adamları uquq qoruyıcı organlarına muracaat etsin.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
