İyül 23-te, cumaertesi künü Minskte mühbir Pavel Şeremet ile sağlıqlaşar, onı iyül 20-de Kiyevde öldürdiler. Matem merasimi saat 11:00-de başlandı. Mühbirni soñki yolğa Bütün Azizler kilsesinden yollaycaqlar. Bu yerde Pavel Şeremet ile sağlıqlaşmağa istegen insanlarnıñ nevbeti tizildi. Radio Svoboda canlı yayın alıp bara.
Mühbirni onıñ babası yanında Şimaliy mezarlıqta saat 14:30-da kömecekler.
Cuma künü Ukraina paytahtında vedalaşuv merasimi keçirildi, merasimde ukrain prezidenti Petro Poroşenko iştirak etti.
Jurnalist Pavel Şeremet iyül 20-de saba işke ketkende avtomobil patlavı neticesinde elâk oldı.
Ukraina ükümeti Şeremetniñ ölümini mahsus yapılğan öldürüv olaraq qayd ete. Amerika Qoşma Ştatları FBR hadimleri ukrain taqiqatçılarına cinayet taqiqatını alıp barmağa yardım ete.
İyül 20-de Ukraina İçki işler nazirligi yolbaşçısınıñ mesleatçısı Zorân Şkirâk ilân etti ki, taqiqat, zenaat faaliyeti ve kergin munasebetler kibi Şeremet öldürüviniñ ola bilecek esas sebeplerini baqıp çıqa. Amma «rusiyeli izler» de ola bile, dep qayd etti o.
Pavel Şeremet – televizion, radio ve devriy neşriyatnıñ Aq Rusiyeli, rusiyeli ve ukrain mühbiri, 1990-cı - 2000-ci seneleri ORT, soñra «Birinci kanal» mahsus haber leyhaları bölüginiñ müdiri edi. Soñki beş yıl devamında Kiyevde yaşay edi, «Vesti» radiosında da çalışqan edi.
