Keriç köprü Rusiye Merkeziy bankınıñ 200 ve 2000 ruble yañı para dizaynı boyunca konkursta qullanıcılarnıñ 5000-den ziyade reyini aldı.
Bu aqta malümat yarışnıñ resmiy Tvoya-Rossiya.rf saytında bildirile.
Beyanatta qayd etilgenine köre, böyle etip, Keriç köprü ğalebege iddia etken saytta altıncı köpür ve Qırımnıñ üçünci timsali oldı.
«Bunen beraber, yarşınıñ interaktiv haritasında Qırımnıñ diger eki itibarğa lâyıq yeri de endi qayd etilgen, bu Batırılğan gemiler abidesi ve Tavriya Hersonesidir», – dep qayd etile konkurs saytında..
Keriç boğazından köpür qurulmasınıñ kerekligi aqqında Putin ta 2014 senesi, işğalden soñ aytqan edi. Köpürni 2018 senesine qadar qurmağa, 2019 senesi yazda işke tüşürmege vade etken ediler.
İyül başında «Krımskiy most» haber agentligi Rusiyeden Qırımğa Keriç boğazında köpür qurulmasınıñ umumiy fiyatı 227,92 milliard ruble teşkil etecegini bildirgen edi.
Bundan evel bildirilgen edi ki, Rusiye ükümeti Keriç boğazında köpürniñ demiryol qısmınıñ vaqtınca işke tüşürilmesiniñ başlanuvını bir yılğa, yani 2018 dekabr ayından 2019 senesi dekabr ayına keçirdi.
Ukraina Rusiyenen Keriç köprüniñ qurulışı ile bağlı añlaşmadan 2014 senesi, Rusiye Qırımnı işğal etken soñ çıqtı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
