Rusiyege boysunğan Qırım ükümetinde bildireler ki, «Kuban-Qırım» gaz borusı quruvı vaqtından evel ömürge keçirile. Ameldeki Qırım yaqarlıq ve energetika naziri Svetlana Borodulinanıñ ilân etkenine köre, Kubandan yarımadağa gaznıñ keçirilmesi bu qışta başlanacaqtır.
Bu aqta Qırım Nazirler şurasınıñ matbuat hızmeti bildire.
«İcracı teşkilâtları er afta maña qurucılıq ceryanı aqqında bildire. Biz olarğa peyda olğan meselelerni çezmege yardım etemiz. Qurucılıq işleri müddetten evel yapıla», – dep ayttı Borodulina.
Bundan evel o, kelecek qışta gaz qıtlaşacaq dep qorqqanını bildirgen edi.
Energetika qamaçavı aqibetlerini yengilleştirmek içün 2015 senesiniñ soñunda Qırım TES-leri gaznı, er zamankige baqqanda, daa erte qullanmağa başladı. Bunen beraber, Qırımnı tabiiy gaznen temin etken yekâne «Çernomorneftegaz» şirketi onıñ istisalını eksiltti. Bu ise, yarımadada gaz qıtlaşmasınıñ sebepçisi ola bile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
