Link açıqlığı

İyül 22-de Qırımtatar Milliy Meclisi reisiniñ muavini İlmi Umerov Qırımdaki rusiyeli Federal havfsızlıq hızmetiniñ idaresine çağırıldı, dep bildire Meclis reisiniñ birinci muavini Nariman Celâl.

Onıñ sözlerine köre, Umerovnıñ taqiqatçığa çağırılğanı sebebi, ekspertiza neticeleri oldı.

«Belli olğanına köre, uzaqtan ekspertiza neticesi keldi. Buña binaen, sözlerine uquq qoruyıcılarnıñ merağını doğurğan videodaki insan, kerçekten de, İlmi Umerov ola, amma o bunı red etmegen edi», – dep yazdı Celâl Facebook saifesinde.

Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı.

Mayıs 19-da Qırımtatar Milliy Meclisiniñ reis muavini İlmi Umerovğa rusiyeli Federal havfsızlıq hızmetiniñ Qırım idaresinde sorğudan soñ qabaatlavnı taqdim ettiler. Mayıs 12-de onıñ evinde tintüv keçirildi, Rusiye FSB-niñ Qırım idaresiniñ taqiqatçısı oña çıqmamaq şartını bildirgen vesiqanı berdi. Bundan soñ taqiqatçılar İlmi Umerovnı iş malümatını faş etmemesi aqqında imza qoymağa mecbur ettiler.

Umerov, Kremlge boysunğan Aqmescitteki Kiyev rayon mahkemesine oña qarşı cinaiy iş açılması aqqında qararğa qarşı şikâyet arizasını berdi.Bunen beraber, o, FSB taqiqatçısı adına ambulatoriyada mahkeme-psihiatrik ekspertizadan öz isteginen keçmege red etkeni aqqında arizanı berdi, bunı şahısnı itibardan tüşürme ve iş adı-sanını aşalama ıntıluvı olaraq körgenini bildirdi.

Rusiyeli adliyeci Mark Feygin «Memorial» uquq qoruyıcı merkezine İlmi Umerovğa siyasiy taqip etilgen statusınıñ berilmesini rica etti.

XS
SM
MD
LG