Link açıqlığı

Qırım akimiyeti qırımtatar sürgünliginiñ qurbanları eykeli içün 500 mln ruble berilecegini bekley


Remzi İlyasov

Rusiye tarafından işğal etilgen Qırımda Bağçasaray civarındaki «Süyren» demiryol stantsiyasında qırımtatar sürgünlik qurbanlarına bağışlanğan abideniñ quruvına 500 million ruble ayırılmasını bekleyler.

Bu aqta Kremlge boysunğan Qırım parlamenti yolbaşçısınıñ muavini Remzi İlyasov bildirdi.

«Bugünki künde abide içün leyha ve masraflar boyunca vesiqalar endi azırlanıldı, ilk nevbette turğan inşaat quruldı, bu cümleden, qırımtatarlarnı Orta Asiyağa alıp ketken ticariy vagon. Beklenilgen kompleks quruvına ayırılacaq para 500 million rubleni teşkil etecektir», – dedi o, dep bildire müessiseniñ matbuat hızmeti.

Onıñ sözlerine binaen, leyha boyunca, kompozitsiya qırımtatar qorantalarınıñ biri sürgünlikten evel, sürgünlik yerlerinde ve olarnıñ tarihiy vatanına avdet olunğanda ayatını kösterecektir.

Qurulacaq eykelniñ müellifi rusiyeli eykelci, İlya Glazunovnıñ Rusiye ressamlıq, eykelcilik ve mimarcılıq akademiyasınıñ eykelcilik kafedrasınıñ müdiri Salavat Şerbakov ola, o Aqmescitte tiklenilgen «nezaketli adamlarğa» bağışlanğan abideni yaptı.

Süyren demiryol stantsiyasında sürgün etilgenlerge bağışlanğan abideniñ birinci inşaatı açılışı mayıs 18-de keçirildi. Bu yerden 1944 senesi sürgün etilgen adamlarnı taşığan ilk eşelonlar çıqtı. Umumen olaraq, 180 biñden ziyade insan sürgün etildi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG