Rusiye tarafından işğal etilgen Qırımda ofisten marum qalğan «Avdet» qırımtatar gazetasınıñ hadimleri evden çalışa. Bu aqta Qırım.Aqiqatqa bergen izaatında Qırımtatar Milliy Meclisi reisiniñ birinci muavini Nariman Celâl bildirdi.
«Bina şimdilik yoq, «avada turalar». Er biri «Avdet» içün evinden yaza. Şimdiki vaqıtta muarririyet ayrı çalışa», – dep qayd etti o.
Onıñ sözlerine köre, şimdilik Aqmescit meclisiniñ toplaşuvları ne yerde keçirilecegi belli degil, ve ofisni faal şekilde qıdırmaylar.
Celâlnıñ qayd etkenine binaen, ofissiz qalğan «Avdet» muarririyeti mahkemege muracaat etmeycek, çünki formal olaraq bu bina Qırım ve Sevastopol şeeri musulmanları diniy idaresiniñ malı ola.
İyül 19-da Nariman Celâl Aqmescit regional meclisi ve «Avdet» qırımtatar gazetası ofisten marum qalğanı aqqında bildirdi.
Onıñ malümatına binaen, çoq yıl devamında Aqmescit regional meclisi Çehova, 20 adresi boyunca yerleşken edi. 2014 senesi sentâbr ayında, Qırımtatar Milliy Meclisiniñ Merkeziy ofisi yaqalanğan soñ, aynı bu yerge «Avdet» muarririyeti de köçti, gazeta qayd etilüvden keçip olamadı ve adamlarnıñ desteginen 1000 hushası derc etile. Bunen beraber, Celâl bildirdi ki, aynı bu ofiste soñki eki yıl devamında Qırımtatar Milliy Meclisiniñ toplaşuvları, qırımtatar milliy areketiniñ veteranlarınıñ toplaşuvları ve diger merasimler keçirile edi.
Onıñ qayd etkenine köre, soñki yarım yıl devamında bu, regional meclisni ve gazeta muarririyetini ofisten çıqarmaq ekinci ıntıluvdır.
Bu mesele boyunca Rusiyege boysunğan Aqmescit akimiyetiniñ izaatları yoq.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
