Link açıqlığı

Celâl: Qırımda 4 qırımtatarınıñ yaqalanmasına qarşı şikâyet boyunca mahkeme SİZO-da «bomba qoyulğanı» sebebinden başqa künge keçirildi


İyül 21-de, cumaaqşamı künü mayıs 12-de Bağçasarayda yaqalanğan dört qırımtatar kişiniñ apiste bulunma müddetiniñ uzattırılmasına qarşı şikâyetniñ baqılması keçirilmedi. Rusiyege boysunğan işğal etilgen Qırımnıñ Yuqarı mahkemesi toplaşuvı iyül 22-ge, cuma kününe keçirildi. Bu aqta Qırımtatar Milliy Meclisi reisiniñ birinci muavini Nariman Celâl bildirdi.

«2016 senesi mayıs 12-de Bağçasarayda yaqalanğan qırımtatarlarnıñ apiste bulunma müddetiniñ uzattırılmasına qarşı şikayet arizası baqılması boyunca bugün saat 13:00-ke belgilengen mahkeme toplaşuvı keçirilmedi. Mahkeme, SİZO-da bomba qoyulğanı ve video bağını qurmaq imkân olmaycağı aqqında malümatqa esaslanıp, toplaşuvnı yarınğa saat 12:30-ğa keçirdi», – dep yazdı o Facebook saifesinde.

Mayıs 12-de Bağçasarayda rusiyeli uquq qoruyıcılar musulmanlarnıñ evlerinde ve yerli qavehanede bir sıra tintüvler keçirdi. Neticede, dört Bağçasaray sakini yaqalandı ve terrorizmde qabaatlandı: Zevri Abseitov, Remzi Memetov, Rustem Abeltarov ve Enver Mamutov. Olar FSB hadimleri tarafından Rusiyede terroristik teşkilâtı olaraq tanılğan «Hizb ut-Tahrir» teşkilâtında iştirak etkenlerinde şeklenilip yaqalandı.

Kelecek kün, mayıs 13-te Rusiyege boysunğan Aqmescitteki Kiyev rayon mahkemesi yaqalanğan kişilerni iyül 11-ge qadar apiste qapatmaq qararını aldı. Mayıs 24-te Rusiyege boysunğan Qırım Yuqarı mahkemesi adliyecilerniñ şikâyetini red etti ve Enver Mamutov, Zevri Abseitov, Remzi Memetovnı iyül 11-ge qadar apiste qaldırdı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG