Rusiyeden işğal etilgen Qırımda 24 siyasiy mabus, 16 belgisiz ğayıp olğan ve repressiyalardan elâk olğan 10 kişi oldı. Böyle raqamnı Ukraina haber siyaseti naziriniñ birinci muavini Emine Ceppar Ukraina – AB İnsan aqları boyunca muzakerelerde ayttı, dep bildire Ukraina haber siyaseti nazirliginiñ matbuat hızmeti.
«Rusiyeniñ qırımtatarlarğa qarşı repressiya siyasetiniñ delili, birinciden, bugün Qırım territoriyasında 24 siyasiy mabus, 16 ğayıp olğan ve 10 elâk olğan kişi olğanıdır, olarnıñ arasında qırımtatarlarnıñ sayısı böyledir: 18 siyasiy mabus, 10 ğayıp olğan ve 7 elâk olğan kişi», – dedi o.
«Yaqalav, ceza, sorğu ve tintüvler kibi Qırım «uquq qoruyıcı organlarınıñ» böyle qanunsız areketleri insanlarnıñ siyasiy menfaatlarına köre taqip etilmesiniñ deñişmez usulı oldı», – dep ayttı Emine Ceppar.
Ceppar, Qırım tamır halqınıñ aqları bozulması, em Ukraina, em de Avropa Birligi tarafından deral cevap berilmesi içün temel olğanını qayd etti ve eki tarafnı imkânlarnı birleştirip, siyasiy, malümat ve uquq saalarında areket etmege çağırdı.
Qırım Rusiye tarafından işğal etilgen soñ yarımadada Ukraina tarafdarları ve qırımtatar faalleri taqip etilip başladı. Bu aqta uquq qoruyıcılar çoq bildirgen edi. Olar Kremlni insan aqları bozuluvını toqtatmağa çağırğan edi. Amma Moskvada ve rusiyeli Qırım ükümeti repressiyalar aqqında malümatnı red ete.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
