Link açıqlığı

Çubarov: Qırımnıñ işğalden azat etilmesi Rusiyeniñ zayıflaşqanına mütenasiptir


Qırımtatar Milliy Meclisiniñ reisi Refat Çubarovnıñ fikrince, Rusiye ne qadar zayıflaşsa, yarımada o qadar tez işğalden azat etilecektir.

Bu aqta o, «Apostrof» neşriyatına bergen intervyusında ayttı.

«Qırımnıñ qaytarılması, onıñ qaytarılmasınıñ müddeti Rusiyeniñ zayıflaşqanına mütenasiptir. Bunıñ içün Rusiyeniñ iqtisadiy, siyasiy ve arbiy zayıflaşmasına alıp barğan faktorlar ne qadar çoq olsa, Qırımnıñ qaytarılmasınıñ ihtimali o qadar büyüktir», – dep ayttı Çubarov.

«Böyle etip, er angi devletniñ Rusiyenen munasebetleriniñ keñleşmesi bizim içün maqbul olunmaz. Amma! Bu aqta laf etmege başlağanda, birden sual peyda ola: ne içün siz, balalar, sizge ücüm etken devletnen alış-veriş yapasıñız, aceba», – dep qoştı Çubarov.

Refat Çubarov
Refat Çubarov

Tünevin peyda olğan malümatqa köre, Avropa birligine kirmek içün namzet devletleri olğan Montenegro ve Albaniya, Avropa iqtisadiy meydanına kirgen Avropa serbest ticaret assotsiatsiyasınıñ devletleri olğan Lihtenşteyn ve Norvegiya, bunen beraber, Ukraina ve Gürcistan Avropa Şurasınıñ Rusiyege qarşı sanktsiyalarnıñ Qırım işğali sebebinden 2017 senesi iyün 23-ke qadar uzattırmaq qararına qoşuldı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG