Link açıqlığı

Aqmescitte Şevçenko abidesini video nezaretinen teminleycek olalar


Rusiyege boysunğan Aqmescit akimiyeti ukrain şairi Taras Şevçenko abidesi yanında aynı adlı parkta videokamera qoymaq niyeti aqqında bildire. Şeer memuriyetinde böyle qararnıñ sebebi, abide ekinci sefer boyalanğanı olğanını añlata.

«Şevçenko abidesi kene de ukrain timsallerinen boyalandı. Bu vaqia boyunca biz kene de İçki işler nazirligine vandalizm aqqında arizanen muracaat ettik. Abideni yuvalar», – dep bildirdi «RİA Novosti» (Qırım) agentligine Aqmescit memuriyetiniñ şeer hocalığı bölüginiñ müdiri Aleksandr Buslayev.

Onıñ sözlerine köre, abide yanında video nezaretiniñ qoyulması meselesi baqıla. Ükümetke boysunğan «Krıminform» Qırım saytınıñ malümatına binaen ise, Aqmescit memuriyetiniñ yolbaşçısı Gennadiy Baharev Taras Şevçenko abidesi yanında videokamera qoymağa endi avale etti.

İyül 20-de saba içtimaiy ağlarda üstünde ukrain gerbi resmi ve «Yaşasın Ukraina» («Slava Ukrayini») yazısı olğan Şevçenko abidesiniñ fotoresimleri peyda oldı. Bunen beraber, Kobzarnıñ mıyıqları sarı ve mavı boyanen boyalanğan, bu Ukraina devlet bayrağınıñ tüsleridir. Moskvağa boysunğan Aqmescit memuriyeti bu areketlerni «vandalizm eylemi» dep adlandırdı.

Qırımda Ukrain medeniyet merkeziniñ faali Leonid Kuzmin Qırım.Aqiqatqa bergen izaatında abidede işbu yazılarnı provokatsiya dep adlandırdı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG