Link açıqlığı

Yaltada faal yaqalandı: birisi çaqtımı, «qara cedveller» sayesindemi?


Larisa Kitayskaya (soldan) Euromaydan ile birdemlik aktsiyasında

Bazarertesi aqşam saatlerinde Yaltada FSB (Federal havfsızlıq hızmeti) hadimleri yerli faal, Gaspra qasabası şurasınıñ sabıq deputatı Larisa Kitayskayanı yaqaladılar. Soñki eki yıl devamında faal esas Ukrainada yaşay, amma evi ve soy-sopları Qırımda qala.

İlk malümatnı Kyivde yaşağan qızı Kseniya Kitayskaya berdi. Onıñ aytqanına köre, anası separatizmde şeklene.

Berilgen malümatqa köre, Larisa Kitayskayanıñ qızı anası yaqalanğan soñ onıñnen bağlanıp oldı.

Mahsus hızmetlerden kelgen musafirler: tintüv ve qorquzuvlar

Qırım uquq qorçalayıcı gruppasınıñ reberi Olga Skripnik bildirgenine köre, tintüv gece yekünlendi. Malümat taşıyıcıları ve tehnika, şu cümleden Larisa Kitayskayanıñ tintüv vaqtında evinde olğan soy-soplarına ait şeyler de tutıp alındı. Faalnen beraber ömür arqadaşı ve tintüv şaatı olğan eki soyu sorğuğa çekildi.

Larisa Kitayskayanıñ qızı ukrain kütleviy haber vastalarına bildirgenine köre, FSB hadimleri faalge maneviy basqı yapıp, qorquzdılar, Yaltadaki evini tutıp alacaqlarını ayttılar. «Anamnı ekstremizm ile qabaatladılar, evini tutıp alacaqlar, dep qorquzdılar. Anam qasevetlenip yaramadı – «acele yardım» çağırıldı. «Yardım» maşinasında oturğanda men oña telefon ettim. Bir-eki söz ayttım, soñra bir erkek sesi keldi, meni yaramay eşitkenini ayttı, ve bağ üzüldi», – dep ayta o.

Faal ne sebepten yaqalanğan ve tintüv nege esaslanıp keçirilgenine dair bir de bir vesiqa berilmedi

Bir kün keçse de, Rusiye mahsus hızmetleriniñ temsilcileri Larisa Kitayskaya ne ile qabaatlanğanını öyle de aydınlatmadı. Faal ne sebepten yaqalanğan ve tintüv nege esaslanıp keçirilgenine dair bir de bir vesiqa berilmedi. «Sorğu nenen bağlı sualine cevap olmadı. Larisa Kitayskayanıñ qabaat maddesi de aytılmadı. Amma Facebooktaki ekstremist yazılarını añlatmalı, dep ayttılar», – dep bildire Olga Skripnik.

Al-azırda Larisa Kitayskayanıñ Facebook saifesi qapalı. İyül 19-da kün devamında o ve adliyecisi ile bağ olmadı. Soy-sopları FSB onı sorğuğa çekkenini tüşüneler, amma bulunğan yeri aqqında tam bir malümat yoq.

Qırım.Aqiqat Qırım ve Aqyar Rusiye FSB idaresinden bir de bir haber alıp olamadı.

Uquq qorçalayıcılar qayd ete: Larisa Kitayskayanıñ yaqalanmasında añılğan ekstremizm ve separatizm köstere ki, faal Rusiyeniñ ekstremizmge qarşı maddeleri boyunca işniñ daa bir mabusı ola bile. Böylece, insannı cinaiy mesüliyet bekley ve adı terrorist ve ekstremist cedvellerine kirsetile, Rusiye mahsus hızmetleri olarnı ve soy-soplarını bütünley kontrol etmege başlaylar.

Sabıq deputat ve Yalta Euromaydanınıñ faali

52 yaşında Larisa Kitayskaya Büyük Yaltada cemaat faali ve Gaspra qasabası şurasınıñ sabıq deputatı olaraq belli. 2010 senesi Gaspra yolbaşçısı vazifesine namzet köstergen edi. Faqat o vaqıt «regionallılarnıñ» rejimine qarşı çıqqan o ve bir sıra diger muhalifet namzeti saylav bank esabını qayd etkende qıyınlıqlarğa rastkeldi. Bu sebepten saylav komissiyası onı yolbaşçı namzeti olaraq qayd etmedi.

2014 senesi fevral ayında Larisa Kitayskaya Yaltada Euromaydan ile birdemlik aktsiyasını teşkil etti, Rusiyeniñ Qırım işğalinden soñ ise esas Ukrainağa köçip, şimdi de anda otura. Mında iş yapa – ticaretnen oğraşqan şahsiy müessisesi bar.

2014 senesi Larisa Kitayskaya Ukraina halq deputatı namzetini kösterdi. Amma reylerniñ sayısı az olğanından parlamentke keçemedi.

Qırımda soy-sopları ve evi qala, bu sebepten yarımadağa barıp kelmege qarar aldı.

FSB kimge kele

Keçken yılları yapqan faaliyeti bugünki zorluqlarnıñ sebebi ola bile. Malüm ki, Rusiye mahsus hızmetleriniñ ve Rusiye kontrol etken uquq qorçalayıcı organlarınıñ Euromaydan ve diger cemaat aktsiyaları ile alâqaları olğan qırımlılarnıñ «qara cedvelleri» tizildi. Bu insanlarnı, Kreml tayin etken Qırım prokurorı Natalya Poklonskaya aytqanı kibi, cinayetçi olaraq tanıp, mesüliyetke çekmege vade eteler.

«Larisa Kitayskaya Ukrainağa qoltutqan bir faal, bunı gizlemey. Qırımdaki mahsus hızmetlerniñ Euromaydannıñ faal iştirakçileriniñ adları bar. Yaltada, meselâ, böyle cedveller tizildi. Bu cedvellerge köre şimdi de insanlar taqip etile», – dep ayta Olga Skripnik.

Faalniñ Yaltağa kelgenini ögrengen sabıq işdeşleri ya da qomşuları Rusiye mahsus hızmetlerine Larisa Kitayskayanı çaqmaları mümkün edi
Olga Skripnik

Onıñ aytqanına köre, faalniñ Yaltağa kelgenini ögrengen sabıq işdeşleri ya da qomşuları Rusiye mahsus hızmetlerine Larisa Kitayskayanı çaqmaları mümkün edi.

Bu sebepten uquq qorçalayıcılar Qırımğa baracaq olğan esas Ukrainanıñ sakinlerini Rusiye mahsus hızmetleriniñ nezareti altında olğan diger vatandaşlarnıñ tecribesi esasında tizilgen havfsızlıq qaidelerine riayet etmege tevsiye eteler. Yarımadağa barğanlar yanına cep telefonları ve diger tehnikanı almasın, kiygen urbağa diqqat etsin ve ukrain timsallerinden vazgeçsin deyler. Bundan ğayrı, uquq qorçalayıcılar Qırımda olğanda Facebook saifesini vaqtınca qapatmağa ve FSB kontrol etken «Odnoklassniki» ve «Vkontakte» içtimaiy ağlarını qullanmamağa tevsiye eteler. Cep telefonlarında laf etkende ad, körüşüv yeri ve insannıñ şahsiyetini ve bulunğan yerini aydınlata bilecek er angi malümatnı seslendirmemege rica etile.

XS
SM
MD
LG