İşğal etilgen Qırımdan tahminen yüz abituriyent ukrain aliy oquv yurtlarına kirmek içün endi ariza berdi, dep bildirdi Kiyevde keçirilgen brifingte Ukraina tasil naziriniñ birinci muavini İrina Sovsun.
«Tünevinge qadar bizde endi tahminen 250 muracaat oldı, amma Qırım boyunca tek 100-ge yaqın adam vesiqalarnı tapşırdı», – dedi o.
Ukrain aliy oquv yurtlarına kiriş kampaniyası Qırım abituriyentleri içün sentâbr 20-ge qadar devam etecek.
Ukrainada işğal etilgen Qırım mezunları içün malümat kampaniyası teşkil etildi. Bu sene Qırım sakinleriniñ ukrain aliy oquv yurtlarına Tışqı mustaqil bilgige qıymet kesüv sessiyasından keçmeyip kirmek imkânı peyda oldı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
