Türkiye prezidenti Recep Tayyip Erdoğan devlette üç ay devam etecek fevqulade vaziyetniñ kirsetilmesi aqqında ilân etti. Bu aqta Erdoğan iyül 20-de Ankarada onıñ Kabineti ve Milliy havfsızlıq şurasınen körüşüvi devamında yapılğan canlı televizion yayınında bildirdi. Böyle qararnı iyül 15-te muvafaqiyetsiz avdarma ıntıluvından soñ qabul etti.
Bundan evel Erdoğan Al Jazeera telekanalına intervyu berip, ecnebiy devletler avdarma ıntıluvında iştirak ete bilgenini ilân etti, amma er angi devletni aytmaqtan vazgeçti. Erdoğan ayttı ki, avdarmanıñ arqasında Amerika Qoşma Ştatlarında bulunğan Fethullah Gülenniñ yolbaşçılığındaki teşkilât tura.
Bunen beraber, Erdoğan türkiyeli demokratiya er angi telüke astında bulunğanı ve o, avtoritar yolbaşçı olğanı aqqında tahminlerni red etti.
«Biz demokratik parlament nizamı çerçivesinde qalacaqmız, ondan iç bir vaqıt ketmeycekmiz», – dedi o.
Bunan da ğayrı, Erdoğan ilân etti ki, ölüm cezası yañıdan kirsetilmesi aqqında parlament teklifini alğışlaycaq, bu Türkiyeniñ Avropa birligine kirmemesi telükesine ketirse bile.
İyül 20-de Vaşingtonda bir sıra devletlerniñ tışqı işler nazirleri, devlet avdarması ıntıluvından soñ, türkiyeli ükümet tarafından repressiyalarnıñ miqyası aqqında raatsız olğanlarını bildirdi ve Türkiyeni qanunnıñ yuqarılığını ürmet etmege çağırdı.
