İyül 20-ge qadar acılıqqa 280 Qırım musulmanı azırlıq körmege başladı, bu qadar insan vesiqalar tapşırdı, dep bildireler Qırım ve Sevastopol şeeri musulmanları diniy idaresinde (QMDİ).
Şimdiki vaqıtta acılıqqa baracaq insanlarğa aşılama yapıla, dep bildirdiler müessisede.
«Aşılamanıñ Saudi Arabistan qırallığına kirişke qadar 10 kün qalğanından evel ve 3 yıl keçmeden yapılması kerek. Aşılama 2014-2015 seneleri yapılğan olsa, bu aşılama kartında belgilengendir. Cumhuriyette acılıqqa ketecek adamlarğa aşılama yapılması iyül 29-ğa qadar yekünlenmek kerek», – dep qayd ettiler beyanatta.
Acılıqqa baracaq insanlarnıñ gruppaları teşkil etileceginden soñ QMDİ islâm ilimleri ocaları mahsus seminar keçirecek, acılarğa hac devamındaki qaideler ve havfsızlıq tedbirlerini añlatacaq, dep ayttılar Müftiyatta.
Qayd etilgenine köre, bu sene Qırımdaki musulmanlarnıñ acılıqqa barmaları içün yerler sıñırlı degil. 2015 senesi Qırımdan 322 kişi acılıqqa barıp keldi.
Keçken sene Saudi Arabistanda Mekkede hac devamında rıqma-rıq adam olğanından sebep 700-den ziyade insan elâk oldı. Acılıq devamında ölüv islâmnı kütken adamlar içün mubarek bir işaret sayıla. Olarnıñ işanğanlarına köre, böyle kişi Cennetke tüşecektir.
Hac – belli bir vaqıtta Mekke ve onıñ civarındaki muqaddes yerlerniñ ziyaretinen bağlı musulmanlarnıñ ananeviy acılığı sayıla. Acılıq islâmnıñ beşinci şartı ola.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
