Aqmescitteki Kiyev rayon mahkemesi salı künü keçirilgen toplaşuvda avtomobiller yaqalavında şeklenilgen Muyeddin Alivapovnıñ cezasını çıqmama aqqında imzağa deñiştirmege qarar aldı. Bu aqta malümatnı Qırımtatar Qurultayınıñ Merkeziy saylav komissiyasınıñ reisi Zair Smedlâyev bildirdi.
«Bugün Aqmescit şeeriniñ Kiyev rayon mahkemesinde avtomobiler yaqalavında şeklenilgen ve apiste yanvar 23-ten başlap bulunğan Muyeddin Alivapovnıñ apiste bulunma müddetiniñ uzattırılması boyunca nevbetteki mahkeme toplaşuvı keçirildi. Mahkeme, Muyeddin Alivapovnı çıqmama şartınen iyül 23-ten azat etmek qararını qabul etti», – dep yazdı o Facebook saifesinde.
Smedlâyevniñ qayd etkenine köre, böyle qararnıñ sebebi ne olğanı belli degil.
«Belki, onıñ qabaatı isbatlanmağanı sebebindendir, belki de, yañı yaqalanacaqlar içün yerler azırlanğanı sebebindendir, baqarıq!» – dep yazdı o.
Yanvar 23-te Alupka ve Simeizde üç yerli sakin yaqalandı, olarnıñ arasında 21 yaşındaki qırımtatar kişi Muyedin Alvapov oldı, olarnı Qırımnıñ cenüp yalısında maşinalarnı yaqqanlarında qabaatlaylar. Umumen olaraq, 2016 senesi yanvar ayında Büyük Yaltada 12 maşina yandı.
Amma olar yaqalanğan soñ maşnalarnıñ yaqalanuvı toqtatılmadı. Aynı bu iş boyunca Çelâbinsk şeeriniñ sakini de yaqalandı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
