Ukraina baş naziri Vladimir Groysman ve Avropa Birliginiñ tışqı işler boyunca Yuqarı temsilcisi Federika Mogerini iyül 20-de Brüsselde körüşüv keçirip, Rusiyege qarşı sanktsiyalar ve onıñ tarafından işğal etilgen Qırımdaki vaziyetiniñ kerginleşmesi meselelerini muzakere ettiler.
Bu aqta malümat Ukraina Nazirler kabinetiniñ matbuat hızmetiniñ beyanatında bildirile.
«Vladimir Groysman Avropa Birligi tarafına Rusiyege qarşı iqtisadiy sanktsiyalarnı nevbetteki müddetke uzattırmaq qararı içün minnetdarlıq bildirdi. Bunen beraber, işğal etilgen Qırımdaki vaziyetniñ kerginleşmesi Rusiye Federatsiyasına qarşı sanktsiyalarnıñ quvetleştirilmesini ve Avropa Birliginiñ Qırımnıñ ordu ve işğalden azat etilmesine celp etüvini talap ete», – dep bildire matbuat hızmeti.
Ukrain ve halqara uquq qoruyıcı teşkilâtları Qırım Rusiye tarafından işğal etilgen soñ yarımadada insan aqları bozulğanı aqqında ilân ete edi. Rusiye ükümeti tarafından eñ büyük basqın qırımtatarlar ve yarımadada yaşağan ukrain tarafını tutqanlarğa qarşı yapıla.
Rusiyege boysunğan Qırım ükümeti uquq qoruyıcılarnıñ yarımadada insan aqları bozulması aqqında malümat qabartılğan, dep ayta.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
