Link açıqlığı

«Gazprom» ve «Rosneft» Qırımğa sanktsiyalar sebebinden barmay – Mihail Gonçar


«Strategiya ХХІ» globalistika merkeziniñ reisi Mihail Gonçar qayd ete ki, Rusiye Qırım yanındaki Ukraina territorial suvlarında eski burğu aletleri ve «Çernomorneftegaz» işhanesiniñ küçünen burğunen teşiktirmeni alıp bara. Onıñ sözlerine binaen, büyük rusiyeli şirketler bu işlerde, sanktisyalardan qorqıp, iştirak etmey.

Bu aqta o, Qırım.Aqiqat Radiosınıñ saba yayınında bildirdi.

«Belli ki, anda-mında bir şeyler topladılar, ücüz işler yapmaq içün, çünki daa yañı köterüv burğu platforması içün paraları yoq. Elbet, para bere bilgen «Gazprom» ya da «Rosneft» bundan (burğu işlerinden – QA) uzaq tura, çünki birden sanktsiyalarğa oğray bileler. Burğu işlerini «Çernomorneftegaz» işhanesiniñ küçünen alıp baralar», – dep qayd etti ekspert.

«Çernomorneftegaz» Qırım şirketi bildire ki, 2016 senesi altı ay devamında 860 milliondan ziyade gaz kubometrini işlep çıqardı.

«Çernomorneftegaz» işhanesiniñ 100% aktsiyaları Qırım işğalinden evel «Ukraina naftogazı» şirketiniñ mülküyetinde edi. Moskvağa boysunğan Qırım ükümeti işhaneni devletleştirdi.

Bundan soñ Ukraina «Çernomorneftegaz» şirketini Kiyevde yañıdan qayd etti.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG