Ukraina baş prokurorı Yuriy Lutsenko mühbir Pavel Şeremetniñ iyül 20-de maşna patlavı neticesinde elâk olmasını öldürüv dep adlandırdı.
«Vaqia yüz bergen yerden bildirdiler ki, Pavel Şeremet patlatıcı aletten sebep elâk oldı. Bu öldürüvdir. Alena ve merumnıñ bütün dostlarına taziye bildirem», – dep ayttı Lutsenko Facebook saifesinde.
«İşdeşlerimnen beraber cinayetni açmaq içün eimden kelgenini yaparım», – dep qayd etti o.
İyül 20-de saba Bogdan Hmelnitskiy ve İvan Franko soqaqlarını çatışmasında, Kiyev merkezinde maşna patlavı neticesinde mühbir Pavel Şeremet elâk oldı. Patlav saat 7:45-te yüz berdi.
Kiyev politsiyasında bildirdiler ki, taqiqatçılar bu vaqianı mahsus yapılğan öldürüv dep tahmin ete. Mahkemeden aldın taqiqat başlandı.
Ukraina prezidenti Petro Poroşenko mühbirniñ elâk olmasını tezce taqiq etmege avale etti.
Pavel Şeremet – televizion, radio ve devriy neşriyatnıñ Aq Rusiyeli, rusiyeli ve ukrain mühbiri, 1990-cı - 2000-ci seneleri ORT, soñra «Birinci kanal» mahsus haber leyhaları bölüginiñ müdiri edi.
Soñki beş yıl devamında Kiyevde yaşay edi, «Vesti» radiosında da çalışqan edi.
