Link açıqlığı

Saatnıñ esas haberi

Aqmescit ava limanında uçaq seferleriniñ lâğu etilmesi ve keçiktirilmesi devam ete


İyül 20-de, çarşenbe künü Aqmescit ava limanında uçaq seferleriniñ lâğu etilmesi ve keçiktirilmesi devam ete. Bunı ava limanınıñ online tablosındaki malümat tasdıqlay.

Böyle etip, Moskvağa seferler 2-4 saatqa keçiktirile, bu yönelişte sabağa qadar endi altı reys lâğu etildi, bunen beraber, Sankt-Peterburg, Voronej, Samara, Stavropol, Vladikavkaz, Kursk şeerlerine uçaq seferleri lâğu etile.

Ava limanı tablosınıñ malümatına binaen, iyül 21-ge planlaştırılğan 7 uçaq seferi lâğu etildi.

Tünevin «VİM AVİA» şirketiniñ seferleri bir künden ziyade vaqıtqa keçiktirildi.

Fevqulade vaziyetler nazirliginiñ Rusiyege boysunğan Qırım idaresinde bildirgenlerine binaen, iyül 17-de saat 22:30-da Aqmescit ava limanından çıqmaq kerek olğan Aqmescit-Sankt-Peterburg uçağı, arasında 26 bala olğan 220 yolcunen, tehnikiy problemalar sebebinden tek iyül 19-da saat 01:53-te çıqtı, umumen olaraq, sefer 25-ten ziyade saatqa keçiktirildi. Rusiye Cenübiy naqliye prokuraturası vaqia boyunca teşkerüv teşkil etti.

2014 senesi mart ayında yarımada Rusiye tarafından işğal etilgen soñ, Qırım ava limanları Ukraina ükümetiniñ qararınen qapatıldı. O yerge ve o yerden er angi uçuşlar Ukraina qanunlarını ve halqara qaidelerni boza, bunıñ içün ava şirketleri Ukraina ve İKAO tarafından halqara sanktsiyalarğa oğray bile.

Şimdiki vaqıtta Qırımğa uçaq seferleri tek rusiyeli şirketler tarafından teşkil etile.

XS
SM
MD
LG