Qırım uquq qoruyıcı gruppasında bildireler ki, iyül 19-da Yaltada rusiyeli Federal havfsızlıq hızmetiniñ hadimleri Ukraina faal tarafdarı Larisa Kitayskaya, onıñ aqayını ve eki qoranta azasını sorğuğa alıp ketmege tırışa.
Bu aqta uquq qoruyıcılarğa faalniñ qızı ayttı.
«Olar, onen qonuşqanda, añlatalar ki, içtimaiy ağlarda ekstremistik beyanatlar munasebetinen onı sorğuğa alıp keteler», – dep añlattı Qırım uquq qoruyıcı gruppasınıñ idarecisi Olga Skripnik.
Diger tafsilâtlı malümat bildirilmey. Rusiyege boysunğan Qırım uquq qoruyıcılarınıñ resmiy izaatları yoq.
Tünevin bildirildi ki, Yaltada FSB hadimleri Larisa Kitayskayanı «separatizmde» qabaatlap yaqaladı ve onıñ dairesinde tintüv keçirdi.
Ukraina ve Qırım tarafdarlarınıñ taqip etilmesi Qırım Rusiye tarafından işğal etilgen soñ daa sıq oldı. Bu aqta uquq qoruyıcılar bildirgen edi. Olar Kremlni insan aqlarınıñ bozulmasını toqtatmağa çağırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
