Link açıqlığı

Rusiye naqliye prokuraturası Qırımdan uçaq seferiniñ çoq saatlıq keçiktirilmesi sebebinden teşkerüv keçire


Rusiye Cenübiy naqliye prokuraturası «VİM AVİA» ava şirketiniñ 8718 sanlı Aqmescit-Sankt-Peterburg uçaq seferiniñ bir künden ziyade keçiktirilmesi boyunca teşkerüv teşkil etti.

Bu aqta müessiseniñ matbuat hızmeti bildire.

«Qırım naqliye prokuraturası tarafından keçiktirme boyunca Aqmescit ava limanına ziyaret ve teşkerüv tedbirleri teşkil etildi. Prokuratura hadimleri sefer yolcularından 50-den ziyade arizasını qabul etti. Teşkerüv neticesinde qanun boyunca prokuratura tarafından qabaatlı olğanlarğa qarşı tedbirler belgilenecek», – dep aytıla prokuraturanıñ beyanatında.

Fevqulade vaziyetler nazirliginiñ Rusiyege boysunğan Qırım idaresinde bildirgenlerine binaen, iyül 17-de saat 22:30-da Aqmescit ava limanından çıqmaq kerek olğan Aqmescit-Sankt-Peterburg uçağı, arasında 26 bala olğan 220 yolcunen, tehnikiy problemalar sebebinden tek iyül 19-da saat 01:53-te çıqtı, umumen olaraq, sefer 25-ten ziyade saatqa keçiktirildi.

Naqliye prokuraturasınıñ matbuat hızmetinde bildirdiler ki, iyül 18-de avia şirketi elli yolcunı Sankt-Peterburg şeerine diger seferlernen yolladı. Qoşma uçaq qalğan 146 yolcunı iyül 18-de saat 16:30-da almaq kerek edi, amma qayd etilgen vaqıtta uçaq tehnikiy sebeplerden seferge çıqmadı. Avia şirketi keçiktirilgen seferniñ yolcularını aş, suv ve musafirhanelerde odalarnen teminledi, dep qayd eteler prokuraturada.

2014 senesi mart ayında yarımada Rusiye tarafından işğal etilgen soñ, Qırım ava limanları Ukraina ükümetiniñ qararınen qapatıldı. O yerge ve o yerden er angi uçuşlar Ukraina qanunlarını ve halqara qaidelerni boza, bunıñ içün ava şirketleri Ukraina ve İKAO tarafından halqara sanktsiyalarğa oğray bile.

Şimdiki vaqıtta Qırımğa uçaq seferleri tek rusiyeli şirketler tarafından teşkil etile.

XS
SM
MD
LG