Qırımda «VİM AVİA» rusiyeli avia şirketiniñ yüzlerce yolcuları Aqmescit ava limanında seferlerniñ keçiktirilmesi sebebinden taqılıp qaldı.
Fevqulade vaziyetler nazirliginiñ Rusiyege boysunğan Qırım idaresinde bildirgenlerine binaen, birden bir qaç seferniñ yollanılmasınen bağlı qıyınlıqlar peyda oldı. Böyle etip, iyül 17-de saat 22:30-da Aqmescit ava limanından çıqmaq kerek olğan Aqmescit-Sankt-Peterburg uçağı tehnikiy problemalar sebebinden tek iyül 19-da saat 01:53-te çıqtı, umumen olaraq, sefer 25-ten ziyade saatqa keçiktirildi.
«Uçaqta bulunğan 220 yolcudan, bu cümleden, 26 baladan, bazıları seferden vazgeçti ve diger seferlernen ketti. Umumen olaraq, seferni 159 yolcu devam etti», – dep aytıla beyanatta.
Bunen beraber, Moskvağa ketken 9320, 330, 344 ve 342 seferleri keçiktirildi.
Müessisede qayd etkenlerine köre, Aqmescit ava limanında seferleri keçiktirilgen yolcularnen Fevqulade vaziyetler nazirliginiñ ruhiyatçıları ve FVN Qırım idaresiniñ operativ gruppası, bunen beraber, «acele» tıbbiy yardım eki taqımı çalışa. Tıbbiy yardım almaq içün çeşit diagnozlar boyunca 7 kişi muracaat etti, dep bildireler müessisede.
2014 senesi mart ayında yarımada Rusiye tarafından işğal etilgen soñ, Qırım ava limanları Ukraina ükümetiniñ qararınen qapatıldı. O yerge ve o yerden er angi uçuşlar Ukraina qanunlarını ve halqara qaidelerni boza, bunıñ içün ava şirketleri Ukraina ve İKAO tarafından halqara sanktsiyalarğa oğray bile.
Şimdiki vaqıtta Qırımğa uçaq seferleri tek rusiyeli şirketler tarafından teşkil etile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
