Qırımda Bakal belinde keçirilgen «Tavrida» Bütün Rusiye maarif gençler forumınıñ iştirakçileri Keriç köprüniñ maketini topladı, dep bildire «Krımskiy most» haber agentligi.
Haber merkezinde qayd etkenlerine köre, maket toplanılması mahsus çadırda yapıldı, bu yerge tahminen 200 kilogramm rusiyeli konstruktornıñ parçaları ketirildi. Forum iştirakçileri parçalarnıñ 10 türünden 19 metrlik konstruktsiya yaptı.
«Leyhanıñ mimariy vizualizatsiyasını ögrendik ve bu yerde, forumda kütleviy toplamanı teşkil ettik. Büyük iş ve qısqa müddet köz ögüne alınıp, pavilyonda iş daima qaynay edi. Köpürni bütün Rusiyeden kelgen balalar «qura edi», – dep añlattı leyha teşebbüsçisi Yelena İvançuk.
Keriç boğazından köpür qurulmasınıñ kerekligi aqqında Putin ta 2014 senesi, işğalden soñ aytqan edi. Köpürni 2018 senesine qadar qurmağa, 2019 senesi yazda işke tüşürmege vade etken ediler.
İyül başında «Krımskiy most» haber agentligi Rusiyeden Qırımğa Keriç boğazında köpür qurulmasınıñ umumiy fiyatı 227,92 milliard ruble teşkil etecegini bildirgen edi.
Ukraina Rusiyenen Keriç köprüniñ qurulışı ile bağlı añlaşmadan 2014 senesi, Rusiye Qırımnı işğal etken soñ çıqtı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
