Link açıqlığı

Çubarov: Türkiyeniñ avdarma ıntıluvından soñ Qırım boyunca noqta-i nazarı deñişmez


Türkiyede muvafaqiuetsiz arbiy avdarma ıntıluvından soñ devletniñ Rusiye tarafından Qırım işğalini tanımama boyunca noqta-i nazarı deñişmez. Böyle fikirni «112.Ukraina» kanalınıñ yayınında iyül 17-de Qırımtatar Milliy Meclisiniñ reisi Refat Çubarov bildirdi.

«Türkiye tışqı siyasetinde, bu cümleden, Qırımnıñ qanunsız işğalini tanıma/tanımama boyunca noqta-i nazarınıñ deñişmesine Rusiye pek ümüt beslemesin. Türkiye er angi qomşusınıñ topraq bütünligine qol tutacaq: Azerbeycan, Gürcistan kibi, Ukrainanıñkine de. Ve Türkiye Qırımnıñ rusiyeli olğanını tanımaz», – dep ilân etti Çubarov.

Buna baqmadan, o, AQŞ-nen munasebetler kerginleşse, Türkiye ve Rusiyeniñ yaqınlaşa bilecegini qasevetlengenini bildirdi.

«Gülenniñ azat etilmesi sayesinde Qoşma Ştatlarınen munasebetler kerginleşse, bu Erdoğannıñ Rusiyenen yaqınlaşma boyunca bazı adımlar atqanını köstere bile», – dep ayttı Meclis reisi.

Bundan evel Türkiyedeki vaqialar munasebetinen Refat Çubarov Ukraina içün siyasiy taraftan istiqrarlı ve demokratik Türkiyeniñ emiyetini qayd etken edi.

İyün 15-ten 16-ğa keçer gecesi Türkiyede devlet avdarması ıntılıvı yüz berdi.

Kütleviy çatışmalar ve atışma neticesinde eñ azdan 265 kişi elâk oldı ve 1500-den ziyade yaralandı. Türkiye ükümeti tahminen 6 biñ insannıñ yaqalanması aqqında ilân etti, olarnıñ arasında fitneci arbiy adamlar ve mahkeme temsilcileridir.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG