Link açıqlığı

Aqmescitte avia bombanı arındırmaq içün demiryol naqliyesi toqtatıldı


İyül 17-de Aqmescitte avia bombanı arındırmaq içün demiryol naqliyesiniñ areketi toqtatıldı, bomba Salğır özeni yanındaki Kim soqağı rayonında tapıldı. Bu aqta Fevqulade vaziyetler nazirliginiñ Kremlge boysunğan Qırım idaresinde bildireler.

«Bu yerge Rusiye Fevqulade vaziyetler nazirliginiñ Qırım bölüginiñ pirotehnika mutehassısları birden keldi, olar tapılğan şeyni ve civarındaki territoriyanı baqıp çıqtı. Tapılğan şeyniñ fugas aviatsion bombası olğanı belgilendi, onıñ umumiy ağırlığı 250 kilogrammnı teşkil ete (FAB-250). İçki işler nazirliginiñ hadimleri, avia bombağa yabancı adam keçmesin dep, territoriyanı sarıp aldı», – dep ayttılar müessisede.

Bu vaqıt Kremlge boysunğan Aqmescit şeer memuriyetinde fevqulade vaziyetler komissiyasınıñ fugas aviatsion bombasını zararsız alğa ketirmesi boyunca toplaşuv keçirildi. Avia bomba tapılğan territoriya yanındaki soqaqlarnı qapatmamaq ve avto naqliye areketini sıñırlanmamaq qarar alındı. Ameliyat keçirilgen vaqıtta demiryol naqliyesi areketi sıñırlandı. Bu yerde acele tıbbiy yardım taqımı nevbette tura edi.

«Saat 17:08 Baş idare Mahsus taqımınıñ pirotehnika mutehassıları bombanı topraqtan çıqardı ve mahsus tehnika vastasınen Rusiye Fevqulade vaziyetler nazirliginiñ poligonına ketirildi, o yerde havfsız şekilde yoq etildi», – dep qayd etti FVN Qırım baş idaresiniñ müdir muavini.

İyül 16-da Aqyarda Aqmescit-Aqyar yolunıñ yanında Ekinci Cian cenki vaqtındaki 500 kilogrammlıq bomba zararsız alğa ketirildi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG