«İslâm devleti» taqımı Nitstsada yüz bergen ücüm içün mesüliyetni boynuna aldı, vaqia neticesinde 84 insan elâk oldı, 200-den ziyade kişi yaralandı.
İçtimaiy mediada taqımda bildireler ki, olarnıñ «askeri» yük maşnasınıñ aydavcısı edi.
Ücüm etken 31 yaşındaki Mohamed Lauaej Bulel Nitstsa kurort şeeriniñ yalısında ücüm etti ve adamlarğa ateş açqanda politsiya tarafından öldürildi.
Vaqianı taqiq etken Paris prokurorı Fransua Molens iyül 15-te ilân etti ki, ücümniñ «terroristik teşkilâtnıñ faaliyeti alâmetleri» bar, ve taqiqatçılar «ücümciniñ destek köstergen suç ortaqları bar olğanını belgilemege tırışa».
Bulel Tuniste doğdı, amma Frenkistanğa qanun boyunca köçti. Onıñ dayanıqsız ve içkicilikke avesli olğanını aytalar, o apayınen ayırıla. Onıñ babası frenk televizionına ayttı ki, Bulel dinden uzaq edi.
Frenkistanda Nitstsada yüz bergen teraktnıñ qurbanlarına bağışlanğan üç kün matem ilân etildi.
İyül 14-te aqşam İngiltere yalısında kezgen ve Bastiliyanı alma kününe bağışlanğan fişenkni baqqan onlarca insanlarnı urğan yük maşnasınıñ aydavcısınıñ şahsiyeti resmiy olaraq belgilendi.
İyül 14-te ücümci yük maşnasınen Frenkistan milliy bayarmına bağışlanğan fişenkke baqmaq içün toplaşqan adam sürüsinden tahminen eki kilometr keçti, bundan soñ ateş açtı.
Ücüm neticesinde 84 insan elâk oldı. Paris prokurorınıñ malümatına binaen, elâk olğanlar arasında 10 bala ve ösmür oldı, 202 yaralanğan kişiden 52 ağır alda buluna, olardan 25 insan ayat saqlağan aletlernen.
