Link açıqlığı

Tışqı işler nazirligi ukrainlerge Türkiyege ziyaretlerden vazgeçmege tevsiye ete


Ukraina Tışqı işler nazirligi Ukraina vatandaşlarını Türkiyege ziyaretlerden, bu devlette arbiy avdarma ıntıluvı sebebinden, vazgeçmege çağıra. Bu aqta Ukraina Tışqı işler nazirliginiñ konsul hızmeti bölügi Facebook saifesinde bildire.

«Türkiye Cumhuriyetinde fevqulade vaziyet ve komendant saatı kirsetilgeni, bu devletniñ esas şeerlerinde ve naqliye qavuşaqlarında areketniñ sıñırlanğanı sebebinden, Tışqı işler nazirligi Ukraina vatandaşlarını Türkiyege ziyaretlerden vaziyet eyileşmeycegine qadar vazgeçmege çağıra», – dep aytıla beyanatta.

Tışqı işler nazirligi Türkiyedeki vaziyetni nezaret astında tuta ve eñ doğru malümatnı almaq içün bütün imkânlarnı qullana.

Nazirlik bu devletniñ territoriyasında bulunğan ukrainlerge muqayt olmağa, cemaat toplaşqan yerlerde bulunmamağa, soqaqlarda bulunmanı sıñırlamağa tevsiye ete.

İyül 15 aqşam Türkiyede ükümni elde etkenlerini ilân etken arbiy adamlar devletniñ bütün territoriyasında arbiy vaziyet ve komendant saatını kirsetkenlerini bildirdi.

Türkiyede arbiy avdarma ıntıluvı toqtatılğandır, çünki Türkiye prezidenti Recep Tayyip Erdoğan iyül 16-da İstanbulğa keldi ve tarafdarlar sürülerine o «vazifeden ketmegenini» ayttı. Bunen beraber, o, isyannı «hiyanetlik eylemi» dep adlandırdı. Erdoğan avdarma tarafdarlarınıñ «qattı» cezalanacaqlarını vade etti.

Ükümetniñ bildirgenine köre, devlet avdarma ıntıluvı vaqtında eñ azdan 60 kişi elâk oldı ve silâlı quvetlerniñ 754 azası yaqalandı. Türkiye politsiyasınıñ yolbaşçısınıñ sözlerine binaen, elâk olğanlar arasında eñ azdan 16 fitneci oldı.

Türkiyede Silâlı quvetler er vaqıt lâdiniy yönelişniñ tarafdarları sayıla edi ve bir qaç kere ükümni elde tecek edi, qaysı biri, olarnıñ fikrince, islâmistlerniñ eline tüşken edi. Amma orta islâmistlerden ibaret olğan ameldeki ükümet arbiy adamlarnıñ tesirini eksiltip oldı ve olarnı nezaret astına alıp oldı.

Soñki sefer türkiyeli arbiy adamları 1997 senesi avdamasız ükümetni yoq etip oldı. Soñki büyük arbiy avdarma ise, Türkiyede 1980 senesi yüz berdi.

XS
SM
MD
LG