Link açıqlığı

«Yedinaya Rossiya» Devlet Dumasına Qırım namzetlerini resmiy şekilde taqdim etti


İyül 14-te, cumaaqşamı künü işğal etilgen Qırımda «Yedinaya Rossiya» firqasınıñ Qırım regional bölüginiñ III-ci konferentsiyasınıñ 2-ci basamağı keçirildi, onıñ çerçivesinde Devlet Duması saylavlarına cedvel ve okruglar boyunca namzetler taqdim etildi.

Bu aqta siyasiy quvetniñ matbuat hızmeti bildire.

Qararğa binaen, cedvelniñ başında Rusiyege boysunğan Qırım yolbaşçısı Sergey Aksönov oldı. Bunen beraber, onıñ muavinleri Mihail Şeremet ve Ruslan Balbek, rusiyeli Qırım prokurorı Natalya Poklonskaya, firqanıñ Aqyar regional bölügi siyasiy şurasınıñ azası Anton Şkaplerov, Devlet Duması deputatı Oleg Lebedev ve Aqyar Gagarin rayonınıñ rusiyeli memuriyeti şurasınıñ deputatı Sergey Liseytsev cedvelge kirdi.

Aqmescit boyunca firqa namzeti olaraq Rusiyege boysunğan Qırım parlamentiniñ spiker muavini Andrey Kozenko, Keriç boyunca – Qırım spikeriniñ birinci muavini Konstantin Baharev, Kezlev boyunca – Qırım deputatı Svetlana Savçenko taqdim etildi.

Rusiye Devlet Dumasına nevbetteki saylavlar sentabr 18-de keçirilecek. İşğal etilgen Qırımda da rey berilecek.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG