Link açıqlığı

Ayrı devletlerniñ terrorizmini toqtatmayıp, terrornı yoq etmek imkânsızdır – Çubarov


Qırımtatar Milliy Meclisi reisi Refat Çubarov Frenkistandaki Nitstsa şeerinde yüz bergen terakt neticesinde adamlarnıñ elâk olması munasebetinen taziye bildirdi.

«Nitstsada yüz bergen terroristik eylem neticesinde 84 alınğan adam ayatı... Bir an içinde yüzlerce qorantalarğa belâ keldi, olarnıñ yaqınları, çeşit millet ve din adamları, terakt qurbanları oldı», – dep yazdı Çubarov Facebook saifesinde.

O, halqara terrorizm aqqında aytıp, Qırımnı işğal etken Rusiye aqqında da hatırlattı, rusiyeli ükümet tarafından öldürilgen, hırsızlanğan ve yaqalanğan qırımtatarlarnı hatırladı.

«Öz içki problemalarını çezmek ve tışqı maqsatlarğa irişmek içün cenkni saylağan ayrı devletlerniñ terroristik faaliyetini toqtatmayıp, ayrı, em de kollektiv terrornıñ yoq etilmesi imkânsızdır. Elbet, men Rusiye ve Ukrainağa ücüm etken, Vatanımnı, ukrain Qırımnı işğal etken onıñ yolbaşçıları aqqında aytam... Nitstsada teraktnıñ qurbanları olğanlarnıñ yaqınlarınen beraber qayğıram, amma olarğa soñsuz belâdan ve yaqınlarını coyğanından keçmege nasıl etip, yardım eteyim?», – dep qayd etti Qırımtatar Milliy Meclisiniñ reisi.

Nitstsada Bastiliyanı alma künü qayd etilgen vaqıtta yüz bergen terakt neticesinde 84 insan elâk oldı, daa 100-ge yaqın kişi yaralandı. Dünya Frenkistannen onıñ terrorizmge qarşı küreşinde birdemlik olğanını bildire.

Elâk olğanlar arasında bir Ukraina vatandaşı bar, daa eki ukrain yaralandı.

Frenkistanda iyül 16, 17 ve 18 künleri milliy matem künleri olaraq ilân etildi.

XS
SM
MD
LG