Kremlge boysunğan Qırım parlamentiniñ deputatları ukrain iş adamı Dmitriy Firtaşnıñ «Qırım titanı» işhanesini ziyaret etti. Qırım parlamentiniñ matbuat hızmetiniñ bildirgenine köre, deputatlar tsehlerni baqıp çıqtı ve iş taqımı ile körüşüv keçirdi.
Qırım parlamentiniñ deputatı Svetlana Savçenko işhaneniñ taqımı ile körüşüvde Qırım iqtisadı içün «Qırım titanı» zavodınıñ emiyetini qayd etti.
Müessise matbuat hızmetiniñ bildirgenine köre, Savçenko qayd etti ki, «ğarbiy sanktsiyalarnıñ kirsetilmesinen bağlı müşkülliklerge baqmadan, işhane işini toqtatmadı, aksine, unikal istisalını muvafaqiyetli inkişaf ettirmege başladı».
Onıñ fikrince, «devletniñ sanayı siyaseti strategik yönelişi olaraq italnıñ yerine başqasını qoyma istisal inkişafına ve işhaneniñ raqiplik qabiliyeti seviyesini arttırmasına yol berecektir», dep qayd ettiler Qırım parlamentiniñ matbuat hızmetinde.
Ukrain iş adamınıñ mülkü olğan «Qırım titanı» işhanesi yarımadada qamaçav şaraitinde çalışa.
Yanvar 10-da Qırımnıñ rusiyeli yolbaşçısı Sergey Aksönov LifeNews telekanalına bergen intervyusında bildirdi ki, «Qırım titanı» yañı tseh qurulması boyunca yañı yatırım leyhasını azırlay.
Dmitriy Firtaşnıñ DFGroop şirketinde «Qırım titanı» işhanesiniñ işinen bağlı er angi izaatlarnı bermekten vazgeçeler.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
