Link açıqlığı

Frenkistanda Nitstsada terakt qurbanlarına bağışlanğan üç kün matem ilân etildi


Nitstsada terakt yüz bergen yer

Frenkistanda iyül 14-te aqşam frenk Nitstsada yüz bergen teraktnıñ qurbanlarına bağışlanğan üç kün matem ilân etildi, dep bildireler kütleviy haber vastaları.

Radio Svobodanıñ bildirgenine köre, iyül 14-te aqşam İngiltere yalısında kezgen ve Bastiliyanı alma kününe bağışlanğan fişenkni baqqan onlarca insanlarnı urğan yük maşnasınıñ aydavcısınıñ şahsiyeti resmiy olaraq belgilendi.

Ücüm etken insan 31 yaşındaki frenk-tunisli kişi oldı, o, politisyanen atışma neticesinde elâk oldı.

İyül 14-te aqşam yüksek sürat ile ketken 19 tonnalı yük maşnası adam sürüsine uruldı ve eki kilometr devamında sağ adamlarnıñ üstünde keçti.

84 kişi elâk oldı. Elâk olğanlar arasında çoq bala oldı. 100-den ziyade insan zararlandı, 18 yaralanğan kişi ağır alda buluna.

Frenkistan prezidenti Fransua Olland yüz bergen vaqianı terakt dep adlandırdı. Cuma kününe keçer gecesi o, mahsus televizion muracaatında elâk olğanlarnıñ qorantalarına taziye bildirdi.

Nitstsada bütün kütleviy merasimler lâğu etildi ve plajlar qapatıldı.

Şimdilik ücüm içün mesüliyetni kimse boynuna almadı.

XS
SM
MD
LG