Qırımda Rusiye Qara deñiz flotunıñ deñiz aviatsiyasınıñ tahminen 20 uçağı ve vertolötı Opuk poligonı rayonında oquv bomba atuvı ve raketa ateş açmanı keçirdi.
Bu aqta Qara deñiz flotunıñ malümat teminlenmesi bölüginiñ müdiri birinci rang kapitanı Vâçeslav Truhaçev bildirdi.
«Qırımda Opuk deñiz desant poligonınıñ rayonında Be-12, An-26 uçaqları ve Ka-27 vertolötları oquv bomba atuvını, Mi-8 vertolötları ise, idare etilmegen ava raketalarınen yalı nişan noqtalarına ateş açtı. Oquvda 20-den ziyade uçqan alet işletildi», – dep ayttı Truhaçev.
Onıñ sözlerine binaen, oquv bomba atuvları ve raketa ateş açmaları deñiz aviatsiyası ayrı qarışıq aviatsion polkunıñ uçma taktik oquvı çerçivesinde keçirildi.
Oquv devamında qayıqlarğa qarşı Be-12 uçaqları ve Ka-27PL vertolötları faraziy duşmannıñ suvaltı gemisini tapma ve yoq etmeni ömürge keçirdi, asker endirme içün uruşnıñ keçirilmesi ve ava askerleriniñ endirme ve zembil vatsasınen endirme vaqtında gemi quvetlerine destek kösterme vazifelerini becerdi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
