Link açıqlığı

Putin Qırımda tekrar «referendum» boyunca teşebbüs gruppasını teşkil ete bile – Berezovets


Rusiye prezidenti Vladimir Putin Qırım statusı aqqında tekrar «referendum» keçirilmesi fikrini faal şekilde ileriley ve onıñ azırlanılması boyunca teşebbüs gruppasını da teşkil ete bile, amma bunı tek halqara cemaatçılıqnıñ destegi ile yapacaqtır. Böyle fikirni Qırım.Aqiqat Radiosınıñ saba yayınında ukrain Milliy strategiyalar Fondunıñ yolbaşçısı Taras Berezovets bildirdi.

«Tekrar referendumnıñ keçirilmesi meselelerinen oğraşmağa başlaycaq nasıldır teşebbüs gruppası da peyda ola bile. Amma kene de, añlaymız ki, Putin böyle referendumnı tek halqara teşkilâtlarnıñ, ya da nasıldır devletlerniñ eñ azdan nasıldır minimal destegini alğan soñ keçirecek. Bunı, mına, biz açıqmız, 14 senesi er şey qanun boyunca olğanını kene tekrarlamağa isteymiz, dep köstermek içün yapacaqtır», – dep qayd etti o.

Bütün Rusiye cemaat fikrini ögrenme merkezi soravnıñ neticelerini halqqa bildirdi. Neticelerge köre, işğal etilgen Qırım sakinleriniñ çoqusı, eki yıl evel kibi «referendum» keçirilse, yarımadanıñ Rusiye terkibine kirmesi içün rey bermege azır olğanını ayttı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG