Nitstsada yüz bergen terroristik ücüm neticesinde 84 insan elâk oldı, o yerde yük maşnası Bastiliyanı alma künü qayd etilgen vaqıtta adam sürüsine kirdi.
Vaqia yüz bergen yerge kelgen Frenkistan içki işler naziri Bernar Kaznevniñ bildirgenine köre, 100-den ziyade insan zararlandı, 18 yaralanğan kişi ağır alda buluna. Elâk olğanlar arasında çoq bala oldı.
İyül 14-te, cumaaqşamı künü aqşam frenk kurort Nitstsa şeerinde Bastiliyanı alma kününi qayd etken adam sürüsine yük maşnası yüksek süratnen uruldı.
İngiltere yalısında fişenk şou keçirilgen vaqıtta bir qaç yüz metr keçken, bundan soñ ateş açqan cinayetçige politsiya ateş açıp, onı öldürdi.
Nitstsa şeer yolbaşçısı Kristian Estrozi bildirdi ki, bundan soñ yük maşnasında silâ ve granatalar tapıldı.
Frenkistan prezidenti Fransua Olland yüz bergen vaqianı terakt dep adlandırdı. Cuma kününe keçer gecesi o, mahsus televizion muracaatında elâk olğanlarnıñ qorantalarına taziye bildirdi.
Ollandnıñ sözlerine binaen, devlette iyül 26-da yekünlenecek fevqulade vaziyet rejimi daa üç ayğa devam ettirilecek. Mütenasip qanun leyhası eñ yaqın vaqıtta parlamentte baqılacaq.
İç bir taqım ücüm içün mesüliyetni boynuna almadı.
Paris prokuraturası ücüm boyunca terrorizm aqqında madde boyunca cinaiy iş açtı.
Amerika Qoşma Ştatları prezidenti Barak Obama teraktnı takbih etti, onı «deşetli» dep adlandırdı ve AQŞ öz eski ittifaqdaşınen birdemlik olğanını ilân etti.
Birleşken Milletler Teşkilâtı Havfsızlıq şurası öz beyanatında «varvar ve qorqaq teraktını» takbih etti ve onı «cinayetli ve delilsiz» dep adlandırdı.
Avropa Birligi reisi Donald Tusk elâk olğanlarnıñ qorantalarına ve bütün Frenkistan sakinlerine taziye bildirdi. «Ücüm hususan adamlar serbestlik, musaviylik ve qardaşlıqqa bağışlanğan bayramnı qayd etken vaqıtta yapılğanı şaşırta», – dep ayttı Donald Tusk.
Nitstsada bütün kütleviy merasimler lâğu etildi ve plajlar qapatıldı.
